Centjarigxo de Unua Esperanto-Klubo en Brazilo

Por Redakcio

17 de março de 2006

Feliĉan datrevenon, brazila organizita E-movado! Antaŭ precize 100 jaroj, la 17-an de Marto, grupo de idealistoj gvidataj de prof-ro João Keating kaj inĝ. Tobias Rabello Leite kunvenis en Campinas por fondi la unuan Esperanto-grupon de Brazilo, "Suda Stelaro". http://www.esperanto.cc/centenario Ni en KCE-Campinas festis tiun daton la unuan fojon antaŭ 15 jaroj, en 1991. De tiam mi persone pli kaj pli interesiĝis pri la historio de tiuj pioniroj.  Dum la esplorado mi trovis informojn pri multaj aliaj idealistoj, en Brazilo kaj alilande. Homoj, kiuj kalkulis je la tiamaj tre limigitaj kondiĉoj por praktiki la lingvon, kompare al ni: leteroj, kiuj bezonis plurajn semajnojn por atingi alian landon, koncizegaj telegramoj kaj apenaŭ ekzistantaj telefonoj. Vojaĝi alikontinente kostis eĉ pli multe ol hodiaŭ. Ĉiuj ĉi limoj ne baris ilian entuziasmon pri la afero Esperanto. Mi, kun tiom da teknikaj rimedoj en la manoj, plej ordinaraj, bagatelaj por ni ĉiuj, sentas do moralan devon kiel plej bone uzi la nunajn teknikaĵojn por fari ion utilan al la sama afero. Mi esperas neniam forlasi la sanan utopion, kiu movis tiujn homojn, nome kredi, ke pli bona mondo eblas, per pli justa ponto-lingvo, kaj iel labori por ĝia efektiviĝo. Feliĉan datrevenon al tiuj, kiujn mi povas nomi "gesamideanoj"! Amike, =james= James Rezende Piton Ĉefdelegito de UEA por Brazilo Campinas-SP centenario @ esperanto.cc PS) Hodiaŭ vespere oni havos la lanĉon de poŝta stampo kaj inaŭguro de ekspozicio en la Centra Biblioteko de Unicamp. http://www.esperanto.cc/centenario/cent-filat-eo.htm La stampo estos uzebla ĝis la 25-a de Marto, en la poŝtoficejo de Unicamp. Se vi volas, ke viaj korespondaĵoj ricevu tiun stampon, sendu ilin ene de unusola koverto *** jam sufiĉe afrankitajn kaj adresitajn *** kovertojn kaj mi zorgos pri tiu stampado por vi, senpage. Se vi volas ke la memorstampo estu uzita sur memoriga poŝtkarto, konsultu http://www.esperanto.cc/centenario/cent-bk-eo.htm

 

< Anterior